كيف نطفئ النار
· قبل ما تقولي كنتي فين و أقولك إني مزنوقة في الشارع من تاني يوم رمضان بسبب جنازة مسئول كبير و ندخل في كلام مالهوش لازمة خلينا نبدأ الحكاية
· هي بلطجة يعني مافيش حاجة اسمها خلينا نبدأ الحكاية كده من عندك .. بمزاجي أنا ،براحتي أنا أنا أنا أنا
· اوك خلينا نبدأ الحكاية براحتك أنت
· اوك ؟ انتي بتاخديني علي قد عقلي و لا إيه
· شهرزاد هامسة لنفسها : يوووة صايم بأة و ما فيش سجاير و هيدوخني معاه
· يا مولاي عقلك كبير لا استطيع حتى مجاراته أنا الضعيفة محدودة القدرات ، و ليس لي رغبة إلا أن اسلي وقت مليكي
· طيب احكي
· أما رجاله ..العيال اعقل منهم
· بتقولي حاجة
· باقول مولاي سيد الرجالة
· طيب خشي في الموضوع بأة كفاية لت و عجن:
"بلغني أيها الملك السعيد ذو الرأي الرشيد أن هذه المدونة كانت ملكي حتى قمت بدعوتك لها فأصبح كل ما فيها تحت سيطرتك حتى القراء لا حول و لا قوة إلا بالله "
· إيه يا بنتي فين محروس في الكلام دة ؟
· آه ما هو كمان في المدونة ، يعني تقدر تعمل فيه اللي أنت عايزة
· أنا اللي يحكمني عليه كنت قتلته هو وأمثاله ممن يستهينون بالغلابة ويقتلون أحلام الأبرياء
· اللي يحكمك ؟ و أنت هاتقعد تستني لما حد يحكمك ؟ تبقي خربت مالطة و ما حدش هايتحرك ،عموما محروس موجود و هاحكيلك عنه
اسمع يا سيدي: "بلغني أيها الملك السعيد ذو الرأي الرشيد انه لو جمعنا كل رجال العالم ليصبحوا رجلا واحد و كل أشجار العالم لتصبح شجرة واحدة و كل فئوس العالم ليبحوا فأسا واحدا وكل بحار العالم ليصبحوا بحرا واحدا و قام الرجل العملاق الواحد بضرب الشجرة الكبيرة الواحدة بالفأس الكبير الواحد لصنع ذلك موجة عملاقة واحدة هاتغرقنا كلنا "
· فعلا : هي دي الحكاية بتاعة محروس ؟ قومي يا شهر زاد، قومي من قدامي روحي عند الست والدتك أنا مش عايز حاجة منك خلاص
· في إيه ما أنا باحكي اهة بس في دماغي مواضيع كتير دخلت في بعضها و مش عارفة ابدأ منين
اسمع يا سيدي: "بلغني "
· خلااااص انطقي علي طول مش عايز مقدمات
ماشي بص يا سيدي" بعد أن قامت قوات الأمن بإطفاء الحريق , وبعد ما رأي محروس خلاله من أشباح داخل النار حاولت استمالته إلي جانبها و دعوته للدخول وسط النيران و بعد إنقاذه في اللحظة المناسبة من الحالة التي أصابته ، تذكر صفوان الرسالة المطوية التي تعجب من شكلها و بقائها سليمة رغم الحريق المروع الذي كان يملأ كل الأرجاء فأخرجها من جيبه ليري ما هي و قد قرأها سريعا لقلة سطورها و لكنه لم يفهم ما تعنيه ، فتوجه إلي غرفة والده الذي كان جالسا علي أرضيتها وسط الرماد ليسأله إن كانت تلك الرسالة تخصه فقراها والده وأكد لولده أنها لا تخصه و أن هذا ليس خطه أيضا ، جلس صفوان إلي جانب والده يعيدان قراءة الرسالة ويحاولان ترتيب أفكارهما ،ماذا يعني ذلك :رسالة تحيطها النيران من كل جانب فلا تحترق ، وأشباح تنادي محروس من داخل النيران ، و حريق يشب دون مبرر ما هذا الذي يحدث ؟ "
· "أاا شهرزاد عايز أسألك سؤال ؟"
· اتفضل يا مولاي
· هي الرسالة كان مكتوب فيها إيه؟ انتي مش ملاحظة انك ماقولتليش لحد دلوقتي ؟
· دايما مستعجل ، الرسالة كان مكتوب فيها "لن تستطيع مياه البحار كافة إطفاء الحريق الكبير"
· بجد ؟ بس كدة؟
· آه
· حتى لو الراجل الكبير الواحد ضرب الشجرة الكبيرة الواحدة بالفأس الكبير الواحد وعمل موجة عملاقة واحدة ؟
· مش عارفة ما هو دة اللي أنا عمالة أفكر فيه من ساعتها
· قومي من قدامي علي بيتك اهلك أنا قلت كدة من الأول بس صعبتي عليا امشي امشي أنا اللي غلطان إني سيبتك تحكي"
وهنا اضطرت شهرزاد للمرواح فسكتت عن الكلام حتى الصباح
