"الشبكة وقعت يا رجالة"
من كاتبة المدونة إلي –حكمدار العاصمة- اقصد إلي قراء المدونة أرجو أن تصلكم مدونتي و انتم في أحسن حال –أآآآقصد .... لا عليكم فهذا من أفعال الشبكة اللي وقعت و ما حدش سما عليها ، لا أعرف متى أستطيع نشر هذه السطور و لكن اليوم هو الاثنين موعد تحديث مدونتي ، و قد أتمكن من ذلك فتكون أمامكم الآن ، و قد لا أتمكن من ذلك بسبب العطل الرهيب فيضيع كلامي في الهواء
طبعا كلكم سمعتم تلك الجملة خلال الأيام القليلة الماضية " الشبكة وقعت" فما هو أول انطباع تبادر إلي ذهنكم ؟ هل فكرتم في شبكة جاسوسية أو عصابة أو منظمة إجرامية دولية مثلي، بصراحة هذا هو أول ما فكرت فيه (علي طريقة الأفلام) و كان ردي دون تفكير "كل الرجالة و لا في حد فلت"
موضوع الشبكات و العصابات موضوع مهم جدا في أقلامنا من قبل "سمارة" و لحد بعد "مافيا" و إلي الأبد ، و لكن هو أيضا واحد من أهم الموضوعات التي لا يمكن للمشاهد العادي الحكم علي مصداقيتها يعني تفتكر أنا أو انت ممكن نعرف إذا كانت الشبكات بتقع كده بسهولة و مرة واحد زي الأفلام ، يكونوا قوة لا تقهر طول الفيلم و فجأة يقعوا ؟ يعني كابلهم بيقطع كده زي الانترنت ؟ (شوفوا ازاي أن كل حاجة في السينما ليها أصل في الواقع)
عموما دة موضوع أنا ما أقدرش احكم عليه لأنني لم أتعامل مع عصابات حقيقية زي بتاعة الأفلام _ اآآآقصد لم أتعامل معها بشكل مباشر ، و ما شفتش عمري عصابة أو شبكة إجرامية بتنهار كده فجأة زي بتاعة الأفلام – اآآقصد أن الشرطة ما بتقبضش عليهم كلهم ، يعني ساعات ياخدوا شوية و يسيبوا شوية عشان يفضل السيرفر شغال – أآآآآقصد يعني ........ تـ قـ ريـ بـ ا ا لـ شـ بـ كـ ة لـ سـ ة و ا قـ عـ ة ..... عموما هاقابلكم لما حد يبقي يقومها عشان الكلام يبقي واضح ...... إلي اللقاء
