اتفقنا منذ الحلقة الأولي لهذه المدونة علي أن الدنيا مسرح كبير أو دار عرض سينمائي كبيرة مليئة بالأحداث و القصص التي يعد البعض منها اغرب من الخيال ، فما رأيكم لو أنا قمنا باختبار أو علي الأحرى وقف كل منا مع نفسه بصدق لمدة دقيقة ، يراجع تفاصيل حياته و طريقة تعامله مع الناس ليطلعنا علي نوع الشخصية التي رآها في نفسه ، فلننتظر دقيقة ...نتأمل أنفسنا ..... ثم نجيب عن السؤال التالي :
من أنت في هذا الفيلم الكبير ؟
البطل
الشرير
السنيد
الطيب
العاشق
إجابة هذا السؤال هامة جدا لمسيرة حياتك و مجتمعك، أترون السبب ؟ السبب ببساطة انك مثلا لو اكتشفت انك الطيب يبقي لازم تتقن دورك فهتلاقي نفسك بتتغير للأفضل لو اكتشفت انك الشرير برضه هاتتقن دورك و هتلاقي نفسك بتتغير للـ...؟ للأفضل برضه انتوا مش مركزين و لا اية ؟
واحد بأة يقولي يا كابتن لطيف آآآآآقصدي يا كاتبة المدونة ممكن نكون هانستفيد لو الطيب بقي أطيب و أتقن دوره لكن هانستفيد بأية لما الشرير يزيد شر و يتقن دوره هو كمان ي ام العريف؟
اقولكوا أنا بأة هانستفيد اية أصل الفايدة هاتبقي كبيرة قوي و انتوا قاعدين تسخروا مني و مش مقدرين، المهم : اما كل واحد يعرف هو ايه حتى الشرير يتقن دوره هنلاقي أن الصورة وضحت الأبيض بقي أبيض ناصع و الأسود بقي أسود غطيس و السنيد عرف أن عمره ما هايبقي بطل فيبطل تسويس و البطل عرف أن عليه بطل عشان كدة لازم يتحمل أقداره ببطولة
و بعدين ايه اللي هايحصل ؟ ببساطة كدة هايبقي سهل أن الطيب الخير يحارب الشرير و يتنصر عليه لكن إحنا اللي متوهينا أن ما حدش عارف حاجة ما حدش عارف مين الكويس بالفعل و مين اللي مش كويس ، نحارب مين و ازاي و الشر لابس قناع الخير ؟
الأفلام بتنتهي نهايات سعيدة عشان كل واحد بيبقي عارف الدور اللي مكتوب له بالضبط الشرير بيعمل دوره و الطيب بيعمل دوره ، و لأنه لا يصح إلا الصحيح فالصح أن الخير ينتصر و تكون النهاية سعيدة ، لكن في الحياة أنت مرة الطيب و مرة الشرير و القبيح آآآآ قصدي... معلش الأفلام مأثرة علي .
عموما عايزاكوا تتعلموا الدري دة كويس و ماتنسهوش " اعرفوا نفسكوا بجد هاتعرفوا أعداءكوا من أصحا بكوا ، و هاتعرفوا انتوا واقفين فين و عايزين تعملوا ايه بالتحديد و هاتريحونا بدل ما تقعد نلف حوالين نفسنا "
بس بجد لو حد فيكوا وقف مع نفسه و عرف حقيقتها يا ريت تكون عنده الشجاعة انه يعلنها يقولنا هنا علي المدونة و اوعدكوا هاقولوكوا أنا كمان اكتشفت أنا اطلع مين بس تخلوها في سركوا و النبي و بلاش فضايح يلا بأه روحوا فكروا و أنا قاعدة مستنياكوا ما تتأخروش
باي
