<الموضوع المرة دي يا جماعة كبير جدا ايه الحكاية الجامدة اللي هانتكلم عنها يا حلوين؟
أفلام الكارتون
طب اية العنوان اللي فوق دة ؟
دة عبارة عن فيلم من الأفلام اللي بيسموها الأفلام العائلية في السينما الأمريكية
و هو مأخوذ عن قصة بيتر بان و بطولة النجم الكوميدي روبين ويليمز
و مين بأة بيتر بان دة؟
هو شخصية خيالية ابتكرها الروائي والكاتب المسرحي الاسكتلندي جاي ام باري ، و هو الصبي الذي يرفض أن يكبر و يلجأ الي الحياة في جزيرة "نيفير لاند" السحرية مع الأطفال التائهين و الجنيات و القراصنة ، و يقابل من وقت لآخر الأطفال الطبيعيين من العالم الحقيقي ، و قد ظهرت الشخصية في عملين لمبتكرها بالإضافة إلي العديد من الأعمال الأخرى الكارتونية و غيرها
و مين روبين ويليمز؟
لأ كدة زهقت و مش هارد عليكوا انتوا مش عارفين حاجة خالص و لا ايه
ما علينا ... قصة الفيلم ظريفة جدا و خيالية من القصص اللي بيقولوا عليها "فيري تيلز" أو حكايات الجنيات الخيالية بتدور حول شخص يدعي بيتر طبعا عايش في عصرنا الحديث بيكتشف بعد لما يكبر في السن و يبقي عنده أولاد انه أصلا من شخصيات "نيفير لاند" او ارض الخيال اللي بتسودها الجنيات الطيبات و أحلام الأطفال ، و يعرف انه تحديدا "بيتر بان" و انه هناك قرصان موتور من "نيفر لاند" قرر خطف أبنائه –أبناء بيتر- للانتقام منه ، ويضطر بمساعد الجنية الجميلة التي تقوم بدورها "جوليا روبرتس" و ما تسألونيش مين جوليا دي إلي العودة إلي "نيفير لاند" التي لا يذكر عنها أي شيء لإنقاذ أبنائه ، ولكنه بدون أجنحته التي تمكنه من الطيران و الحركة الرشيقة و لا يعرف كيف يستخدم السيف و ليست لديه ادني فكرة عن الطريقة التي يستطيع بها محاربة القرصان لاستعادة أبنائه منه ، و خلال الاحداث يكتشف ان عليه ان يتذكر تفاصيل حياته السابقة التي لم يكن يذكر منها شيء ليعرف كيف يتعامل مع عدوه و يستعيد قدراته و يصل في نهاية الفيلم لتحقيق ذلك فقط عندما يتذكر و يدرك أن أحلامه و خياله فيهما كل ما يحتاج من أسلحة و أجنحة فقط عليه أن يتذكر
كل دة باشرح لكم العنوان بس شوف بأه محتاجة قد ايه عشان اتكلم عن الموضوع اللي عايزة اقوله ما تخفوش مش هاطول عليكوا ، احنا قلنا ننا هانتكلم عن الافلام الكارتون ، طيب حد يعرف اول شخصية كارتونية هي مين ؟
علي غير المتعارف عليه اثبتت أبحاثي ان ميكي مش اول شخصية كارتونية ، بس ما تخافوش مش هاقلوكم إن الفراعنة هما أول من صنع شخصية كارتونية ، لأ هو شخص يدعي "ويندسور ماكاي" (1869-1934) و كانت الشخصية اللي اخترعها هي شخصية ديناصورة – انثي-اسمها جريتي و استوحي الفكرة من زيارته لمتحف كان معروض فيه هيكل عظمي لديناصور و تراهن مع احد أصدقائه علي قدرته علي إعادة الحياة لذلك الهيكل و من هنا ولدت جريتي في أول فيلم كارتون بدائي لم يستغرق عرضه سوي دقائق معدودة .
الغريب في الموضوع إني و أنا بابحث عن أول شخصية كارتونية و من كان صانعها اكتشفت إن ذلك الفنان الذي اخترع جريتي كانت له عدة إسهامات هامة في المجال الفني ، أو لنقل انه استغل موهبته لخدمة أهدافه و أهداف بلاده السياسية حيث صنع فيلما آخر بعنوان "غرق السفينة لويزيانا" مصورا الهجوم علي السفينة البحرية لويزيانا فيما يشبه الرسالة الموجهة للقوات الأمريكية للاشتراك في الحرب العالمية الأولي.
و اكتشفت كمان انه له مجموعه من البوسترات التي كانت تسمي "عهود الحرية" أو "ليبرتي بوندز" و هي عبارة عن صكوك أو كوبونات لجمع التبرعات للدولة للمشاركة في الحرب العالمية الأولي – أو كما نطلق عليها المساعدة للمجهود الحربي ، و قد خط عليها بالانجليزية "دافع عن بلدك بأموالك"
العنوان اللي كتبته تذكر ماضيك عشان تطير مش فكرة كوميدية لفيلم يا جماعة و لا هي دعوة سلفية برضه بس البحث عن أصل الفيلم الكارتون شوفوا وصلنا لايه ..الفن بيخدم السياسة و الكارتون علشان نوصل رسالة تاريخية هامة، التحدي إن أولادنا يعرفوا الماضي عشان يقدروا يحلقوا فوق هزائمنا المتتالية .
و صحيح الكارتون مش اختراع مصري و لا عربي و لما جينا نعمل شخصياتنا الكارتونية الخاصة ما قدرناش نهزم في عقولنا و لا عقول ولادنا صورة ميكي ماوس و سوبر مان و غيرهم لكن نقدر ندور علي حاجة عندنا و مش عندهم نقدر نشغل خيالنا ونبهر نفسنا قبل العالم بشخصيات ألف ليلة و ليلة و السير الشعبية و نصدق أحلامنا إننا ممكن يطلعلنا جناحات و نطير و ساعتها علي حظنا الهوا مش هايوقف
