فيلم رعب في غانا

فيلم رعب في غانا
يعلم دارسي الأدب و النقد جيدا معني كلمة purgation أو التطهير و لمن لا يعلمون فهي ذات صلة وثيقة بالأعمال التراجيدية ، و التراجيديا في المسرح –لمن لا يعلم- عكس الكوميديا و هي العمل المسرحي أو الأدبي عموما الذي يحتوي عناصر مميزة منها : أن يكون البطل شخص "نبيل" أو من علية القوم ينحدر به الحال نظرا لظروف خارجة عن إرادته ، و تتطور الأحداث المأساوية به إلي أن يصل إلي لحظة الذروة في العمل الدرامي ، حيث تتكشف له الحقائق و تبدأ الاحداث في السير في اتجاه حل المشكلة أو العقدة الدرامية .
أما التطهير فهو ما يحدث حين ينفعل المشاهد مع تلك الأحداث التراجيدية و المآسي التي تصيب البطل ، فيبكي أو يشعر بالخوف و القلق و أحيانا الرعب الشديد لما قد يتضمنه العرض من مشاهد دامية ، هذا الانفعال الذي يفيق منه المشاهد في نهاية العرض فيكتشف انه خارج تلك الاحداث –مجرد مشاهد ، و انه لم يقع بعد في الخطأ الذي وقع فيه البطل ، و أن أمامه فرصة لتصحيح وضعه – كما فعل البطل و أن يبدأ من جديد – أن كان قد أخطأ بالفعل.
و دلوقتي بأة إيه رأيكم في ماتش نهائي كاس الأمم الإفريقية في ظل الحكاية الصعبة قوي دي اللي كنت باحكيها فوق ، مش بذمتكم كان فيلم رعب؟ مش برضوا فضلتوا كلكم زيي حابسين أنفاسكم لحد اللحظة الأخيرة ؟ حتى بعد ما أحرز فريقنا الهدف الوحيد في المباراة و حاسيين إننا علي حافة الهاوية لحد آخر لحظة لنتعادل و نضطر نلعب وقت إضافي و نعيش الرعب من جديد؟
طيب إيه رأيكم في الناس بعد الماتش و تاني يوم ؟ مش كنتوا حاسين إنهم سعدا و متفائلين ؟ و حاسين إنهم يقدروا يغيروا شكل الدنيا الوحش دة؟و لو سألت حد فيهم كل دة بسبب الكورة يقولك حاجة فرحتنا في وسط الهم اللي إحنا فيه "أصل إحنا كده لازم نتزنق عشان نبين همتنا"
بالضبط زي البطل اللي كان مرفه و متدلع و ابن ناس و بعدين لما خد علي دماغه و بقي .... ابن ..... ناس تانية غير الناس الاولانية يعني فاق و عرف انه لازم ياخد حقه بنفسه ،و عشان ياخده لازم يكون قوي كدة ، و قد كلمته :بقول هالعب يلعب ...يقول هاكسب يكسب ، و برضه لازم تكون الظروف اللي حواليه مساعداه و أهمها توفيق ربنا .. بس ربنا ما بيسمعش دعا حد قد المظلومين و بصراحة إحنا مظلومين ...قصدي يعني الحكم دة بتاع المباراة ظلمنا و افتري علي فريقنا ، و خلانا فعلا حاسيين إننا عايشين في فيلم رعب ، لحد ما جمعنا إرادتنا "الحرة" غير المباشرة و ربنا وفقنا لما لقي عندنا النية الصادقة و قدرنا نحقق الفوز.
شوفتوا العملية سهلة ازاي ...لأ يعني مش سهلة بس ممتعة إننا نتعب عشان حاجة عايزينها...عشان هدف قدمنا عايزين نحققه ،حاجة كويسة عايزين نعملها و بعدين ما إحنا كدة كدة طول الوقت بنشتكي إننا تعبانين و زهقانين و متضايقين و ....خلاص خلينا تعب بتعب بأة نتعب و إحنا مستمتعين و نجيب الكاس ، و شوفوا إحنا كام مليون يعني كاس ورا كاس ورا كاس وشكلنا كدة هاتبقي ليلتنا مش معدية.....ربنا يستر